Մասնակցելու ենք բոլոր մակարդակների ընտրություններին, կառուցելու ենք իրավականորեն ճշգրիտ և բարիության քարոզարշավներ, դիմադրելու ենք քաղաքական կամայականությանը։

Առաջ ենք մղելու իրական և կիրառելի նախագծեր՝ կրթության, առողջապահության, տնտեսության, արդարադատության և մշակույթի ոլորտներում՝ գործնականում ցույց տալով, որ բարոյական քաղաքականությունը Միացյալ Հայաստանը կառուցելու լավագույն ուղին է։

Հնարավոր միջոցներով նպաստելու ենք նոր գաղափարների և մեթոդների, փոփոխությունների և նորացումների իրականացմանը, քանզի դրանք են ցանկացած բնագավառում առաջընթացի գրավականը։

Ընդունելով և խրախուսելով զարգացումն ապահովող նորարարությունները, միտումնավոր չենք ջարդելու ավանդությունները։ Առաջընթացը, առաջին հերթին, ապահովվում է լուսավորությամբ, մեծագույն նպատակներ դնելով և ջանադրաբար սովորելով ու աշխատելով։

Սահմանադրությամբ ամրագրելու ենք մշտապես գործող, առնվազն երկու անկախ պետական մարմիններ՝ տնտեսական անվտանգության և բարոյականության խորհուրդներ, որոնք բացառելու են ցանկացած իշխանության սուբյեկտիվ մոտեցումները այդ հարցերում։

Հիմք ընդունելով հայությանը ի վերուստ տրված՝ ազգերին դեպի նոր հորիզոններ առաջնորդելու առաքելությունը մարդկությանը այս անգամ ուղղորդելու ենք դեպի ՀՈԳՈՒ դարաշրջան։

Որպես հենման կետ օգտագործելու ենք կայացած ու զարգացած Հայաստանի Հանրապետությունն ու այդ վեհ նպատակի շուրջ մեկկեղված հայ ժողովրդին և աշխարհասփյուռ հայ ազգին։

Սիրով և վճռականությամբ լցված՝ օգտագործելու ենք բոլոր ձևերը, որպեսզի ժողովրդի ձևախեղված իշխանությունը իրապես վերադարձնենք ժողովրդին ոչ միայն Հայաստանում, այլև ողջ աշխարհում։

Իսկ դրա հիմնական միջոցը ընտրությունները փողատերերի միջամտությունից ազատելն է։ Այդպես կլինի, եթե ժողովրդի կամքի արտահայտության ողջ գործընթացը կազմակերպվի միմիայն պետության կողմից։

Տքնաջան աշխատանքով, բազում ծրագրեր ներկայացնելով ու իրականացնելով, հանրության հետ մշտապես երկխոսության մեջ լինելով։

Մեզ սպասվում է շատ դժվար աշխատանք՝ ժողովրդին պետք է ապացուցենք, որ քաղաքականությունը և այն ամենը ինչը մեր կյանքն է կարգավորում, պետք է լինի բացառապես բարոյական: